مين الحد اللى ممكن تطلق أدامه إحساسك منغير تجميل ولا تزييف وبصراحة مطلقه من غير أى خوف لفهم سطحى لأفكارك؟
على فكرة ...الحد دة ممكن يكون إنسان (انت أو حد تانى غيرك بتلاقي نفسك معاه وجواه)
أويكون كتاب أو" كاتب..أو شجرة أو بحر ...أو نيل ..أو بيت شعر...أو كائن معين بتحبه ...أو مكان بتنطلق فيه وجواااه ومعاه"
الإجابة مش إجبارى ...هى بس...مجرد سؤال بنكشف بيه حاجات كتير ونفتش بيه جوانا ..جوانا اللى مليان حواديت ...ملهاش نهاية والشاطر اللى قلمه يكتب حواديته بكل حرية وصراحة
ولو لسة ملقتش الإجابة ... يبقى لازم تعيد حسابات كتير فحياتك ... وترتبها صــح علشان متتهوش منك بس الأول اديها الأمان واوعدها تحفظها ومتضيعهاش تانى عشان تلاقيها جيالك مبسوطة وبتقف جنبك وبتسندك ومش بتخليك تتحوج لحد غيرك ... لان في ناس بتعيش العمر كله منغير نفسها بس بتعيش طول العمر ممسوخة الملامح ... وحاجات كتير كمان ممكن تضيع منك وتتمسخ معاها ... بس أكيد ربنا حيجمعكم مع بعض لو تعبت عشانها شوية
ودور على راحتك فالأماكن الصح وبالطرق الصح .. لأن فى مننا بيجي يريح نفس بيتعبها أكتر
أسيبكم مع نفسكم شوية بقى ... بس خلى بالك ...
اوع تبص عليها من فوق ... خش جواها وسيبك لابس ايه وشكلك ايه ... لانك لحظة متلاقيها ... مش حيفرق معاك أى حاجة تانية لا شكلك ولا لونك ... حتكون بس حاسس انك عاوز تحضن الدنيا كلها
سارة صراف
6 - نوفمبر - 2009 مع بعض الاضافات 11-7-2012
ليست هناك تعليقات:
إرسال تعليق